Երեկ խորհրդարանում քվեարկության դրվեց ՀԱԿ խմբակցության պատգամավոր Նիկոլ Փաշինյանի կողմից առաջադրված ՀՀ նախագահ Սերժ Սարգսյանին պաշտոնանկ անելու օրենքի նախագիծը ԱԺ օրակարգ մտցնելու հարցը, որին կողմ քվեարկեցին ընդամենը չորս պատգամավոր եւ, բնականաբար, այն չանցավ: Ի դեպ, մինչ քվեարկությունը, ԱԺ պատգամավոր, «Ազատ դեմոկրատներ» կուսակցության նախագահ Խաչատուր Քոքոբելյանը առաջարկեց Նիկոլ Փաշինյանին հանել նախագիծը եւ նորից հանգամանալից քննարկել, սակայն դարձավ վերոնշյալ նախագծին «կողմ» քվեարկողներից մեկը: Հենց այս, ինչպես նաեւ ներքաղաքական իրավիճակի մասին «Իրավունքը» զրուցեց ԽԱՉԱՏՈՒՐ ՔՈՔՈԲԵԼՅԱՆԻ հետ:
-Պարոն Քոքոբելյան, ինչո՞վ էր պայմանավորված, որ մատնանշելով Ն. Փաշինյանի կողմից բարձրացված ՀՀ նախագահի իմպիչմենտի հարցում առկա թերությունները, այնուամենայնիվ, «կողմ» քվեարկեցիք, որպեսզի այն ԱԺ օրակարգ մտնի:
– Ազգային ժողովում այդ նախագծի քննարկման ժամանակ առաջարկեցի Նիկոլ Փաշինյանին, որպեսզի դա հիմա քվեարկությունից հանվեր ու տարընթերցման եւ տարաբնույթ մեկնաբանությունների տեղիք չտրվեր` այդ նախագծի հետ կապված, որովհետեւ ինքս էլ վերապահումներ ունեմ: Առաջարկում էի, որ մեր ընդդիմադիր դաշտի բոլոր քաղաքական գործիչները, որոնք հետամուտ են լինում իրենց կողմից որդեգրած քաղաքական ուղեգծին, մասնակից դառնան, եւ լսեն բոլորի կարծիքները, բայց պարզ է, որ ինքը չհամաձայնեց: Այնուհանդերձ, գտնում եմ, որ ես չէի կարող դեմ լինել մի նախագծի, որը հնարավորություն կստեղծեր… Նախ այդ նախագիծը վերջնական տեսքի չէր բերված, եւ պահանջվում էր, որ այն քննարկվեր ԱԺ-ում: Բնականաբար, ես չէի կարող դեմ լինել այդ խնդիրը Ազգային ժողովում քննարկելուն, եւ իմ քվեարկությունը պայմանավորված էր այդքանով:
– Մամուլում արդեն իսկ շրջանառվում է, որ Դուք լինելով բիզնեսմեն պատգամավոր ու «կողմ» քվեարկելով Ն. Փաշինյանի նախագծին` առիթ տվեցիք, որ Ձեր դեմ էլ որոշակի գործընթացներ սկսվեն…
– Նախ` առնվազն լուրջ չեմ համարում «բիզնեսմեն պատգամավոր» ձեւակերպումը եւ, բնականաբար, համակարծիք չեմ: Իմ ամբողջ քաղաքական գործունեության ընթացքում` լինելով ընդդիմադիր դաշտում եւ հիմա էլ այդ դաշտում իմ գործունեությամբ միշտ առիթ եմ ունեցել չարախոսներին ապացուցելու ճիշտ հակառակը: Ավելին` իմ գործունեության մեջ մշտապես հետեւողական եմ եղել իմ քաղաքական գործունեությանը եւ այն նպատակներին, որ ես ի սկզբանե ունեցել եմ: Եվ այդ առումով դա քննարկման նյութ դարձնելը, առնվազն լուրջ չեմ համարում:
-ԲՀԿ խմբակցության պատգամավորները միասին դուրս եկան ԱԺ նիստերի դահլիճից, որից հետո տեղի ունեցավ Ն. Փաշինյանի նախագիծը օրակարգ մտցնելու քվեարկությունը: Արդյո՞ք ԲՀԿ-ականների դահլիճից հեռանալը հենց սրանով էր պայմանավորված, որպեսզի ստիպված չլինեն դեմ կամ կողմ քվեարկել ՀՀ նախագահի իմպիչմենտի հարցին:
– Անկեղծ ասած, չէի ուզենա այդ տեսանկյունից դիտարկել: Ավելի շատ կարծում եմ` իրենք դեռ իրենց հետ կապված վերադասավորվելու, ինչու ոչ, իրենց անցած ուղին վերաիմաստավորելու եւ ապագային միտված իրենց քաղաքական օրակարգը ձեւավորելու խնդիր ունեն:
– Կարո՞ղ ենք ասել, որ այսօր ընդդիմադիր դաշտում մնացել են միայն անհատներ, քանի որ ՀԱԿ խմբակցությունում ԱԺ ամբիոնից արդեն բացահայտ հակասում են իրար, նույնպիսի իրարամերժ կարծիքներ կան «Ժառանգությունում», ՀՅԴ-ն կարծես գնում է կոալիցիա կազմելու ճանապարհով, իսկ ԲՀԿ-ն այդպես էլ չկողմնորոշվեց:
– Նախ` երբեք ԲՀԿ-ին չեմ համարել ընդդիմադիր քաղաքական օրակարգ առաջ տանող ուժ: Ինչ-որ հատվածներում, այո՛, իրենք ընդդիմադիր քաղաքական օրակարգն են առաջ մղել, եւ, կարծում եմ, ընդդիմության համար դա հնարավորություն է եղել, որքան էլ այլ բան խոսվի բոլորի կողմից: Բայց կարծում եմ` այսօր ԲՀԿ-ի մասին խոսելու իմաստը չկա արդեն: Կկողմնորոշվեն իրենք, հետո կխոսենք այդ մասին: Իսկ ինչ վերաբերում է, թե ընդդիմադիր դաշտում միայն անհատներ են մնացել, այդպես չէ: Ցավոք սրտի, այդպես է Ազգային ժողովում, եւ դա եղել է մեր ընդդիմության ամենամեծ խնդիրը: Կարծում եմ` դա շատ մեծ թեմա է, թե ինչու է ընդդիմադիր դաշտն այս վիճակում: Իմ խորին համոզմամբ, դա քաղաքական օրակարգի ճիշտ չձեւակերպման եւ դրան հետամուտ չլինելու պատճառն է: Թե՛ մենք` որպես քաղաքական ուժ, թե՛ ես` որպես ընդդիմության դաշտում վերջին տարիներին ընդհանրապես քաղաքական գործունեություն ծավալող մարդ` իմ ընկերների, մեր համախոհների հետ միասին, երբեք չենք շեղվել մեր քաղաքական օրակարգից: Սա կարող եմ հպարտորեն ասել եւ դա ոչ թե հպարտանալու համար եմ ասում, այլ համարում եմ, որ այն քաղաքական օրակարգը, որը դու որդեգրել ես, պարզապես, պարտավոր ես այդ օրակարգով գործելու, եւ դա առանձին` որպես դրական կամ բացասական գործունեություն ներկայացնելու խնդիր չեմ համարում:
– Համամի՞տ եք, որ ստեղծված ներքաղաքական իրավիճակում` որպես ընդդիմություն, շահում է ՕԵԿ-ը:
– Բացարձակ: Ես այն կարծիքին եմ, որ ցանկացած դեպքում ՀՀ-ում այն խնդիրները, որոնք լուծման օր առաջ անհրաժեշտություն ունեն, շարունակում են մնալ չլուծված, եւ ցանկացած էներգետիկ կորուստ խնդիրները լուծելու, ուղղորդելու եւ ուղղությունը տանելու առաջ, գնում է պարտության եւ ՀՀ քաղաքացիների շահերից չի բխում: Այսօր, թե սրանից մեկ շաբաթ առաջ, ՀՀ-ում ինձ համար որեւիցե բան չի փոխվել, եւ այն բոլոր հիմնական հիմնախնդիրները, որոնք կային, մնում են մեր քաղաքական օրակարգում, եւ, ինչու ոչ, ընդհանուր ՀՀ քաղաքական դաշտում: Երբեք այն կարծիքին չեմ եղել, որ պետք է սեւի ու սպիտակի բաժանել ու ասել` եթե այս մեկը իշխանության մեջ է, նա ազգի դավաճան է, եթե այս մեկը ընդդիմության մեջ է, ազգային հերոս է. չկա նման մոտեցում, դա շատ խիստ վտանգավոր եւ ոչ կենսունակ մոտեցում եմ համարում: Միշտ էլ այդպես եմ կարծել եւ հիմա էլ համոզված եմ:
Զրուցեց` ՀՐԱՆՏ ՍԱՐԱՖՅԱՆԸ
