Վարչապետի հրաժարականով ՀՀԿ-ն փորձեց քայլ առաջ լուծել ներքաղաքական խնդիրները. «Առաջին լրատվական»-ի հետ զրույցում այս մասին ասաց «Ազատ դեմոկրատներ» կուսակցության ղեկավար, ԱԺ պատգամավոր Խաչատուր Քոքոբելյանը՝ գնահատելով ՀՀ վարչապետ Տիգրան Սարգսյանի հրաժարականի փաստը:
Նա նշեց, թե այն, որ ՀՀ կառավարության հրաժարականն օր առաջ պետք է տեղի ունենար, անկասկած էր, որովհետև ՀՀ կառավարությունը չէր լուծում որևէ խնդիր, որն ուներ ՀՀ քաղաքացին:
«Այսօր ՀՀ առաջին մարտահրավերն արտագաղթն է, սակայն կառավարությունը որևէ քայլ չի ձեռնարկել այն կասեցնելու ուղղությամբ: Բայց ես այն կարծիքին չեմ, թե կառավարության հրաժարականը պայմանավորված է քաղաքացիների խնդիրները լուծելու իշխանության ցանկությամբ: Բնականաբար, ես տեղի ունեցածը պայմանավորում եմ ներքաղաքական զարգացումներով, ինչու չէ՝ Կուտակային կենսաթոշակային օրենքի ձախողմամբ և այն քաղաքական գործընթացներով, որոնք տեղի են ունենում Հայաստանում:
Իմ կարծիքով, Հանրապետական կուսակցությունը փորձեց այս ճանապարհով քայլ առաջ լուծել այդ խնդիրները»,- մեկնաբանեց Խաչատուր Քոքոբելյանը՝ շարունակելով, թե կա մի ակնհայտ իրողություն, որ այսօր դժգոհությունը մեծ էր նաև իշխանության ներսում: «Ազատ դեմոկրատներ» կուսակցության ղեկավարի կարծիքով՝ բոլորն էին գտնում, որ կառավարության քաղաքականությունը համարժեք չէր ներկայիս իրավիճակին:
Դիտարկմանը, թե որքանո՞վ կարող է վարչապետի հրաժարականը թելադրված լինել Մոսկվայից՝ նա արձագանքեց՝ ասելով, թե չէր շտապի նման հայտարարություններ անել: «Ես հակված եմ մտածելու, որ վարչապետի հրաժարականը պայմանավորված է ներքին պատճառներով»,- կրկնեց Խ. Քոքոբելյանը: