Որեւէ արտառոց բան չկա այդ հանդիպման մեջ, Խաչատուր Քոքոբելյանն ու Դավիթ Շահնազարյանն ընկերներ են եւ կարող են ցանկացած պահի էլ հանդիպել: Այս մասին NEWS.am-ի թղթակցի հետ զրույցում ասաց «Ազատ դեմոկրատներ» կուսակցության մամուլի խոսնակ Անժելա Խաչատրյանը:
Նա նշեց, որ Դավիթ Շահնազարյանն արդեն իսկ պատասխանել է լրատվամիջոցներին հուզող հարցերին, նրա պատասխանին ավելացնելու որեւէ բան չկա:
Ինչ վերաբերում է նոր քաղաքական պլատֆորմ ստեղծելու, «Ազատ դեմոկրատների» վերափոխման մասին խոսակցություններին, ապա Անժելա Խաչատարյանը նշեց, որ կուսակցությունը որեւէ վերափոխման էլ չի ենթարկվի, իրենք հետեւողականորեն շարունակելու են իրականացնել իրենց քաղաքական ուղեգիծն ու ամրագրված ծրագրերը:
Նշենք, որ «Ժողովուրդը» գրել էր, թե նախօրեի գիշերը «Անի-պլազա» հյուրանոցի բացօթյա սրճարանում ՀՀ ազգային անվտանգության ծառայության նախկին ղեկավար Դավիթ Շահնազարյանն ու ԱԺ պատգամավոր, «Ազատ դեմոկրատներ» կուսակցության նախագահ Խաչատուր Քոքոբելյանը զրուցում էին։ «Ժողովուրդ»-ի տեղեկություններով, այժմ Քոքոբելյանն ու Շահնազարյանը շատ հաճախ են հանդիպում ու հիմնականում քննարկում են միասին նոր ամերիկամետ քաղաքական պլատֆորմ ստեղծելու հարցը։
Տեղեկություններ են շրջանառվում նաեւ, որ չի բացառվում՝ Դավիթ Շահնազարյանը համալրի «Ազատ դեմոկրատներ» կուսակցության շարքերը։ Սակայն Դավիթ Շահնազարյանը «Ժողովուրդ»-ի հետ զրույցում մեր հարցին որեւէ կոնկրետ պատասխան չտվեց։ «Շատ մարդկանց հետ եմ հաճախ հանդիպում, դա նշանակում է… Կներեք, բայց անիմաստ է… Այդքանը կարող եմ ասել»,–նշել էր Շահնազարյանը: