ԱԺ պատգամավոր, «Ազատ դեմոկրատներ» կուսակցության նախագահ Խաչատուր Քոքոբելյանը խստորեն դատապարտում է «Ժառանգություն» խմբակցության պատգամավոր Զարուհի Փոստանջյանի՝ Երևան-Մեղրի միջպետական ճանապարհին ռուս սահմանապահների կողմից տեղաշարժի սահմանափակումը:
«Ոչ նրա համար, որ Զարուհին ԱԺ պատգամավոր է, այլ` ՀՀ քաղաքացի: Եվ արդեն որերորդ անգամ ականատեսն ենք դառնում, որ մեր պետության ներսում պաշտպանված չէ անգամ ազատ տեղաշարժի իրավունքը»,- Tert.am–ին ասաց Խաչատուր Քոքոբելյանը:
Հիշեցնենք, որ Զարուհի Փոստանջյանը, ով մասնակցել էր Սյունիքի մարզի թիվ 38 ընտրատարածքում կուսակցության կողմից առաջադրված թեկնածու Սամվել Կարապետյանի՝ Ագարակում անցկացվող նախընտրական քարոզարշավին, տեղեկացրել էր, որ ռուսական սահմանապահ ուժերի տեսուչը խոչընդոտել է իրենց տեղաշարժը և կոտրել է տեսախցիկը:
Իսկ ՌԴ Անվտանգության դաշնային ծառայության ՀՀ-ում Սահմանապահ վարչությունից ի պատասխան հայտնել էին, թե Զարուհի Փոստանջյանն գտնվել է Հայաստանի և Իրանի Իսլամական Հանրապետության հետ պետական սահմանին, որն, ըստ Ռուսաստանի և Հայաստանի միջև կնքված միջպետական պայմանագրի, հսկում են Ռուսաստանի սահմանապահները և որ Փոստանջյանն ու իր ուղեկցող անձինք իրենց դրսևորել են հանդուգն կերպով, փորձել են սադրել հակաիրավական գործողություններ։
Անդրադառնալով ՌԴ սահմանապահների հաղորդմանը, Խաչատուր Քոքոբելյանն ասաց.«Ռուսական կողմի մեկնաբանությունն էլ խոսում էր այն մասին, որ իրենք խախտում են արել: Այսինքն՝ դա ամբողջովին հակասահմանադրական գործողություն էր»:
ԱԴ կուսակցության ներկայացուցիչը նշեց, որ որքանով տեղակցված է՝ «համատեղ սահմանապահ զորքերի ներկայացուցիչները Հայաստանի Հանրապետության տարածքում , ոչ սահմանային, որևիցե գործողություն անելու իրավունք չունեն»:
«Եվ այդ առումով, ավել փաստեր պետք չեն հասկանալու համար, որ տեղի են ունեցել կամայականություններ: Եվ կարծում եմ, որ պետական իշխանությունները հավուր պատշաճի պարտավոր են և՛արձագանքել, և՛ այդ խնդրի պարզաբանումը ստանալ»,- ավելացրեց պատգամավորը: