«Ազատ դեմոկրատներ» կուսակցությունում տեղյակ են եղել նախկին արտգործնախարար Ալեքսանդր Արզումանյանի կուսակցությունից դուրս գալու մտադրության մասին: Այս մասին NEWS.am-ի թղթակցի հետ զրույցում ասաց «Ազատ դեմոկրատներ» կուսակցության մամուլի խոսնակ Անժելա Խաչատրյանը:
«Պարոն Արզումանյանը անկախ քաղաքական գործիչ է, ինքն է որոշում ինչպես շարունակել իր հետագա քաղաքական գործունությունը, եթե այդպես է ճիշտ գտել, մենք հարգում ենք իր որոշումը եւ հաջողություն մաղթում հետագա գործունեության մեջ»,- ասաց նա:
Մամուլի քարտուղարը նշեց, որ Ալեքսանդր Արզումանյանի եւ կուսակցության ներկայացուցիչների հարաբերությունները եղել են նորմալ, որեւէ խնդիր չկա:
Նշենք, որ ՀՀՇ նախկին անդամներ Ալեքսանդր Արզումանյանը, Արարատ Զուրաբյանը, Հովհաննես Իգիթյանն ու Կարապետ Ռուբինյանը հանդես են եկել հայտարարությամբ, որտեղ նշում են, որ հպարտանում են 25 տարվա ՀՀՇ-ի քաղաքական գործունեությամբ եւ մտադիր են վերագրանցել կուսակցությունը:
Հիշեցնենք, որ ՀՀՇ արտահերթ 18-րդ համագումարը ձայների մեծամասնությամբ կողմ է քվեարկել առաջարկված որոշմանը, ըստ որի ՀՀՇ-ն միանում է ՀԱԿ կուսակցություն ստեղծելու նախաձեռնությանը եւ վերանվանվում է «Հայ ազգային կոնգրես» կուսակցության: Կուսակցության որոշման նախագծի մեջ նշված է, որ այն շարունակում է մնալ Հայոց Համազգային շարժման ամբողջ պատմական ժառանգության տերը, պատասխանատուն եւ ժառանգորդը: Նշվում է, որ վերակազմավորումն իրականացվում է ՀԱԿ ստեղծման նախաձեռնող խմբի ՀՀՇ համագումարին ուղղված առաջարկությունների հիման վրա: